Parish News

ಮೇಯಾಚ್ಯಾ 2 ತಾರಿಕೆರ್ 2022ವೆರ್ ಆಮ್ಚ್ಯಾ ಫಿರ್ಗಜ್ ಸ್ಥಾಪನಾಚೊ ದೀಸ್. ತ್ಯಾ ದಿಸಾ ಸಕಾಳಿಂ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾ ಸವೆಂ ಚಾರ್ ಭುರ್ಗ್ಯಾಂಕ್ ಪಯ್ಲ್ಯಾ ಕುಮ್ಗಾರಾಚೊ ಸಂಭ್ರಮ್ ಆಸಾ ಕೆಲ್ಲೊ. ತ್ಯಾ ದಿಸಾ ಸಾಂಜೆರ್ 6.30 ವರಾಂಕ್ ಇಗರ್ಜೆಚ್ಯಾ ಉಗ್ತ್ಯಾ ಮೈದಾನಾರ್ ಸಾಂಸ್ಕ್ರತಿಕ್ ಸಾಂಜ್ ಆಸಾ ಕೆಲ್ಲಿ. ಲ್ಹಾನ್ ಭುರ್ಗ್ಯಾಂ ಥಾವ್ನ್ ವ್ಹಡಾಂ ಮ್ಹಣಾಸರ್ ಸಬಾರ್ ಜಣಾಂನಿಂ ಪಂಗ್ಡಾ ನಾಚ್ ಸಾದಾರ್ ಕೆಲೊ. ವೆದಿ ಕಾರ್ಯಾಕ್ ಮುಖೆಲ್ ಸಯ್ರೊ ಜಾವ್ನ್ ನೆಲ್ಲಿಕಾರ್ ಸಾಂ. ಅಂತೊನ್ ಕಾಲೆಜಿಚೊ ಮುಖೆಲಿ ಮಾ. ಬಾ. ಆಲ್ವಿನ್ ಸೆರಾವೊ ಹಾಜಾರ್ ಅಸ್ಲೆಲೆ. ವೆದಿಚೆರ್ ಫಿರ್ಗಜ್ ವಿಗಾರ್ ಮಾ. ಬಾ. ರೊನಾಲ್ಡ್ ಪ್ರಕಾಶ್ ಡಿ’ಸೋಜಾ, ಪಿರ್ಗಜ್ ಗೊವ್ಳಿಕ್ ಪರಿಶದೆಚೊ ಉಪಾಧ್ಯಕ್ಷ್ ಮಾನೆಸ್ತ್ ಲೀಯೊ ಡೆನಿಯಲ್ ಡಿ’ಸಿಲ್ವಾ, ಕಾರ್ಯದರ್ಶಿ ಶ್ರೀಮತಿ ಐರಿನ್ ಹಿಲ್ಡಾ ಕುಟಿನ್ಹಾ, ಸರ್ವ್ ಆಯೊಗಾಂಚೊ ಸಂಯೋಜಕ್ ಮಾನೆಸ್ತ್ ಸುನಿಲ್ ಮಿರಾಂದ ಹಜಾರ್ ಅಸ್ಲೆಲಿ. ಮುಖೆಲ್ ಸಯ್ರೊ ಮಾ. ಬಾ. ಆಲ್ವಿನ್ ಸೆರಾವೊ ಹಾಣಿಂ ಫಿರ್ಗಜ್ ಸ್ಥಾಪನಾಚ್ಯಾ 35 ವ್ಯಾ ವರ್ಸಾಚೊ ಆನಿ ಇಗರ್ಜೆಚ್ಯಾ ಬಾಂದ್ಪಾಚೊ 40 ವ್ಯಾ ವರ್ಸಾಚೊ ಜುಬ್ಲೆವಾಚೊ ಲೋಗೊ ಉಗ್ತಾವಣ್ ಕರ್ಚ್ಯಾ ಮುಕಾಂತ್ ಅಧಿಕೃತ್ ರಿತಿನ್ ಜುಬ್ಲೆವ್ ವರ್ಸಾಕ್ ಆರಂಭ್ ದಿಲೆಂ. ವಿಗಾರ್ ಬಾಪಾನಿಂ ಫಿರ್ಗಜ್ ಪತ್ರ್ ‘ನೆಕೆತ್ರ್’ ಉಗ್ತಾಡಾಕ್ ಹಾಡ್ಲೊ. ಉಪಾಧ್ಯಕ್ಷ್ ಮಾನೆಸ್ತ್ ಲೀಯೊ ಡೆನಿಯಲ್ ಡಿ’ಸಿಲ್ವಾನ್ ಸರ್ವಾಂಕ್ ಸ್ವಾಗತ್ ಕೆಲೊ, ಕಾರ್ಯದರ್ಶಿ ಶ್ರೀಮತಿ ಐರಿನ್ ಹಿಲ್ಡಾ ಕುಟಿನ್ಹಾನ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಪ್ರಮುಕ್ ಆಕರ್ಷಣ್ ಜಾವ್ನ್ ನೆಲ್ಲು ಪೆರ್ಮನ್ನೂರ್ ಹಾಚೊ ಪಂಗಡ್ ಕಾಮಿಡಿ ಕಂಪನಿ ತರ್ಪೆನ್ ಮನೋರಂಜನ್ ಆಸಾ ಕೆಲ್ಲೆಂ. ಕಾರ್ಯೆಂ ಭೋವ್ ಯಶಸ್ವೆನ್ ಸಂಪ್ಲೆಂ.