ನವೆಂಬರ್ 19, 2017 ತಾರಿಕೆರ್ ಸಾಂಜೆರ್ 6.00 ವೊರಾಂಕ್ ಆಮ್ಚ್ಯಾ ಗಂಟಾಲ್ ಕಟ್ಟೆ ಫಿರ್ಗಜೆಚಾ ನಿತ್ಯಾದಾರ್ ಸಭಾಸಾಲಾಂತ್ ಫಿರ್ಗಜ್ ಸಮೂದಾಯ್ ದಿಸಾಚೆಂ ಸಾಂಸ್ಕೃತಿಕ್ ಕಾರ್ಯೆ ಮಾಂಡುನ್ ಹಾಡ್ಲೆಂ. ಮೊನ್ಸಿಂಜೊರ್ ಬೋವ್ ಮಾನಾಧಿಕ್ ಡೆನ್ನಿಸ್ ಮೊರಾಸ್ ಪ್ರಭು ಹಾಂಚಾ ಅಧ್ಯಕ್ಷಪಣಾಖಾಲ್ ವೆದಿಕಾರ್ಯೆಂ ಚಲ್ಲೆಂ. ಮುಖೆಲ್ ಸಯ್ರೆ ಜಾವ್ನ್ ಕರ್ನಾಟಕ್ ಸರ್ಕಾರಾಚೊ ಆದ್ಲೊ ಮಂತ್ರಿ ಆನಿ ಮೂಡ್‍ಬಿದ್ರಿ ಕ್ಷೇತ್ರಾಚೊ ಶಾಸಕ್ ಮಾನೆಸ್ತ್ ಅಭಯಚಂದ್ರ ಜೈನ್, ಮೂಡ್‍ಬಿದ್ರಿ ವಾರಡೊ ವಿಗಾರ್‍ವಾರ್ ಭೋ| ಮಾ| ಬಾ| ಪೌಲ್ ಸಿಕ್ವೇರಾ, ಮಾ| ಬಾ| ಆಂಟನಿ ಫೆರ್ನಾಂಡಿಸ್, ಲ್ಹಾನ್ ಕ್ರೀಸ್ತಾಂವ್ ಸಮೂದಾಯ್ ಮೂಡ್‍ಬಿದ್ರಿ ವಾರಾಡೊ ಹಾಚಿಂ ಪ್ರೇರಕಿ ಸಿ| ಪ್ರೆಫಿಲ್ಡಾ, ಬೆಥನಿ ಕಾನ್ವೆಂಟ್ ತಾಕೊಡೆ ಆನಿ ಶ್ರೀಮತಿ ಸಬಿತಾ ಮೊನಿಸ್ ಹಾಜಾರ್ ಆಸ್‍ಲ್ಲಿಂ.
ಫಿರ್ಗಜ್ ವಿಗಾರ್ ಮಾ| ಬಾ| ಜೆಸುದಾಸ್ ಡಿಕೋಸ್ತಾ, ಆಮ್ಚ್ಯಾ ಪಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಶ್ರೀ ಆಲ್ವಿನ್ ಸಂತೋಷ್ ಮಿನೇಜಸ್, ಕಾರ್ಯದರ್ಶಿ ಶ್ರೀ ಆಲ್ವಿನ್ ಮಿನೇಜಸ್, ಲ್ಹಾನ್ ಕ್ರಿಸ್ತಾಂವ್ ಸಮೂದಾಯ್ ಹಾಚಿ ಫಿರ್ಗಜ್ ಪ್ರೇರಕಿ ಶ್ರೀಮತಿ ಅನಿತಾ ಮಿನೇಜಸ್ ಹಾಜರ್ ವೆದಿಚೆರ್ ಆಸ್‍ಲ್ಲಿಂ. ಫಿರ್ಗಜ್ ವಿಗಾರ್ ಮಾ| ಬಾ| ಜೆಸುದಾಸ್ ಡಿಕೋಸ್ತಾ, ಹಾಣಿಂ ಪ್ರಸ್ತಾವಿಕ್ ಉತ್ರಾಂ ಉಲವ್ನ್ ಸಮೂದಾಯ್ ದಿಸಾ ಸರ್ವಾಂಕ್ ಬೊರೆಂ ಮಾಗ್ಲೆಂ. ವೆದಿ ಕಾರ್ಯವೆಳಿಂ ಆಮ್ಚ್ಯಾ ಫಿರ್ಗಜೆಂತ್ ಸೆವಾ ದಿಲ್ಲ್ಯಾ ಸರ್ವ್ ಗುರ್ಕಾರಾಂಕ್ ತಶೆಂಚ್ ಫಿರ್ಗಜ್ ಲ್ಹಾನ್ ಕ್ರಿಸ್ತಾಂವ್ ಸಮೂದಾಯೆಚಿಂ ಪ್ರೇರಕ್ ಆನಿ ಪ್ರೇರಕಿಂಕ್ ಜಾವ್ನ್ ಎದೊಳ್ ಮ್ಹಣಾಸರ್ ಸೆವಾ ದಿಲ್ಲ್ಯಾಂಕ್ ಸನ್ಮಾನ್ ಕೆಲೊ. ಮೊನ್ಸಿಂಜೊರ್ ಬೋವ್ ಮಾನಾಧಿಕ್ ಡೆನ್ನಿಸ್ ಮೊರಾಸ್ ಪ್ರಭು ಹಾಂಕಾಂ ಫಿರ್ಗಜೆ ತರ್ಫೆನ್ ಮಾನ್ ಕೆಲೊ. ಆಮ್ಚ್ಯಾ ಫಿರ್ಗಜೆಂತ್ ಜಾಂವ್ಚಿಂ ಸರ್ವ್ ಬರೆಮಣಾಂಕ್ ಕಾರಣ್ ಜಾವ್ನಾಸ್ಚ್ಯಾ ಆಮ್ಚ್ಯಾ ಫಿರ್ಗಜ್ ವಿಗಾರ್ ಮಾ| ಬಾ| ಜೆಸುದಾಸ್ ಡಿಕೋಸ್ತಾ ಹಾಂಕಾಂ ಫಿರ್ಗಜ್‍ಗಾರಾಂ ತರ್ಫೆನ್ ಮೊನ್ಸಿಂಜೊರ್ ಬಾಪಾನಿಂ ಆನಿ ವೆದಿಚೆರ್ ಆಸ್‍ಲ್ಲ್ಯಾ ಸರ್ವಾನಿಂ ಮಾನ್ ಅರ್ಪಿಲೊ.
ವೆದಿ ಕಾರ್ಯೆಂ ಸಂಪ್ತಚ್ ಸಾಂಸ್ಕೃತಿಕ್ ಕಾರ್ಯೆಂ ಮಾಂಡುನ್ ಹಾಡ್ಲೆಂ. ಹಾಂತುನ್ ವಾಡ್ಯಾಗಾರಾಂನಿ, ಯುವಜಣಾಂನಿ ತಶೆಂಚ್ ಭುರ್ಗ್ಯಾನಿಂ ಭೋವ್ ಉರ್ಭೆನ್ ಭಾಗ್ ಘೆತ್ಲೊ. ವಿಗಾರ್ ಬಾಪಾನಿಂ ಕಾರ್ಯಾಚಾ ಯಶಸ್ವೆಕ್ ಕಾರಣ್ ಜಾಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಗೊಡ್ವಿನ್ ಮಿನೇಜಸ್ ಅನಿ ಲಿಶೆಲ್ ಕೊರೆಯಾನ್ ವೆದಿ ಕಾರ್ಯೆಂ ಆನಿ ಸಾಂಸ್ಕೃತಿಕ್ ಕಾರ್ಯೆಂ ಚಲವ್ನ್ ವೆಲೆಂ. ಸಾಂಸ್ಕೃತಿಕ್ ಕಾರ್ಯೆಂ ಸಂಪ್ತಚ್ಚ್ ಸರ್ವಾಂಕ್ ರುಚಿಕ್ ಜೆವ್ಣಾಚಿ ವ್ಯವಸ್ಥಾ ಕೆಲ್ಲಿ. ಜೆವಾಣ್ ಸಾಂ ಲೊರೆಸ್ ವಾಡ್ಯಾಚೊ ಶ್ರೀ ಮೆಲ್ವಿನ್ ಡಿ’ಕೊಸ್ತಾ ಹಾಚಾ ಮುಖೆಲ್ಪಣಾರ್ ತಯಾರ್ ಕೆಲ್ಲೆಂ. ಸರ್ವ್ ಕಾರ್ಯೆಂ 10.00 ವೊರಾಂಕ್ ಸಂಪ್ಲೆಂ.
More Photos...
Comments powered by CComment